Дайбаннырова Мария Иосифовна (1928-1987 гг.)

 

Өбүгэбэр киэн туттар хос эбэм Мария Иосифовна Дайбаннырова (06.11.1928 — 07.03.1987)

Мария Иосифовна Таатта улууһун Орто Амма нэһилиэгэр Төрүт хочотугар 5 оҕолоох Анисия Ивановна Татаринова, Иосиф Терентьевич Дайбанныровтар дьиэ кэргэнигэр төрөөбүтэ.

Аҕата Дайбанныров Иосиф Терентьевич 1942 сыллаахха бэс ыйыгар армияҕа барбыта. Кини 4 ини-бии Уоһук, Афанасий, Петр, Константин Дайбанныровтар сэриигэ барбыт уоллаттартан улаханнара.

Уоһук Венгрия дойдутун Будапешт куораты ылыыга кыайыы буолуон аҕай иннигэр кулун тутар 31 күнүгэр өлбүт.

Сэрииттэн 4 уоллаттартан соҕотох Афанасий тыыннаах төннөн кэлэн убайын оҕолорун бэйэтигэр холбоон барыта 11 оҕону дьон оҥортообута.

Хос эбэм Мария Иосифовна кыра оҕо эрдэҕиттэн бэйэтин кыанар, түргэн туттуулаах, кыайыгас-хотугас эбит. Улаханнара буолан, үлэҕэ сыстаҕас, окко-маска, сүөһү-ас көрүүтүгэр тэҥҥэ сылдьыһара, балыстарын, бырааттарын көрөрө-харайара. Оскуолаҕа Чычымахха интернакка олорон үөрэммитэ. Сэрии кэнниттэн ,,Тимошенко» аатынан колхуоска   ыанньыксыттаабыт.Онтон 1949 сыллаахха Аҕа дойду сэриитин  кыттыылааҕа Былахиров Кузьма Гаврильевичтыын көрсөн ыал буолбуттар.Кинилэр барыта 7 оҕоломмуттар.

Мин хос эбэм Мария Иосифовна сатабыллаах хаһаайка, асчыт бэртээхэйэ, иистэнньэҥ мааныта эбит. Кини сүрдээх ыраас туттунуулаах, куруутун дьиэтэ сылаас, ыраас, бэрээдэктээх буолара.Оҕуруот аһын, дьиэ сибэккитин сөбүлээн олордоро. Хонуктаах дьыссаакка нянечканан күнүстэри-түүннэри үлэлиирэ.Эбэм дьоҥҥо-сэргэҕэ үтүө, амарах санаатынан, дьоһун майгытынан ытыктанара.Нэһилиэк тэрээһиннэригэр активнайдык кыттара, ансаамбылларга ыллыыра, оһуохайдыыра.Эһэбитинээн Кузьма Гаврильевичтыын 39 сыл   бииргэ олорбуттара, элбэх сиэн тапталын билбиттэрэ.

Мария Иосифовна Дайбаннырова-Блахирова наҕараадата:

,,1941-1945 сс. Аҕа дойду сэриитигэр килбиэннээх үлэтин иһин мэтээл, ,,Ийэ Албан аата» 3 истиэпэннээх уордьан.Улуу Кыайыы үбүлүөйдээх сылларын мэтээллэрэ.

Мин хос эбэбинэн киэн туттабын уонна киниэхэ махтанабын.

 

 

 

Суруйда Н.Иванова 3 б кылааһын үөрэнээччитэ