Биһиги эбээбит, хос эбээбит, Чичигинарова Дария Семеновна 1921 сыллаахха Чурапчы улууһун  Хатылы сиригэр, Бабаҕа үрэҕин куулатынан олохсуйбут, саха сиэринэн сүөһү -ас ииттэн, үлэлээн – хамсаан, оччотооҕу кэмҥэ син орто  сэниэ ыалга төрөөбүт. Ийэлэрэ Ылдьаана эрдэ өлөн, аҕалара Попов Сэмэн Өндөрөөйөбүс үс кыыһын бэйэтэ ииппит. Эбэбит Суоппуйа диэн эдьиийдээх, Аана диэн балтылаах эбит.

1940 сыллаахха 17 сааһыгар Чичигинаров Петр Никитичка  кэргэн тахсар. Эһэбит Петр Никитич эрчимнээх хамнаныылаах, уус-уран тыллаах киһи эбит. Кини Кыайбатаҕа сатаабатаҕа суох. Эбэбит бастакы оҕотун оҕолоноот, оччотооҕу холкуос салалтатын дьаһалынан Туолумаҕа ыанньыксытынан ананан барбыт. Ол сайыныгар сэрии буолбут. Сэрии… суостаах уота күөдүпчүлэнэ умайбыта, үлэни-хамнаһы кыайар төһүү дьон бары фроҥҥа баран үлэ өссө элбээбит, ыараабыт. Күнүһүн үлэлээн, түүнүн хайыһардыыр, байыаннай үөрэххэ үөрэнэр эбиттэр. Сэрии иккис сылыгар үс ыанньыксыт сүөһүтүн сатыы үүрэн Амма уҥуор Нуотара үрэҕэр Ээбил диэн сиргэ кыстаабыттар. Кыһынын тоҥуу-хатыы, байыаннай кэм дьарамай саннытыгар сүктэриллибиттэр. Киһи суох буолан хонууга биригэдьиирдии сылдьыбыт, үгүс киһи сэриигэ баран, ханнык үлэҕэ ананаҕын да бара тураҕын. Эһэбит МТС-ка тракторист, комбайнер, слесарь, тимир ууһа буолан бронь ылан сэриигэ барбатах. Кыайыы туһа диэн күүстэрин харыстаммакка үлэлээбиттэр.

Эбэбит, эдьиийбит Настааны, кыыһын Пашаны кытта

Күүтүүлээх кыайыы күнүн Хаадьыма бааһынатыгар атынан тараах тарата, оҕуһунан сир тиэрэ сылдьан истибиппит диэн эбээбит кэпсиирэ эбитэ үһү. Үөрүүлэриттэн бары дэриэбинэҕэ сүүрэн кэлбиттэр, киэһэ улахан миитин буолбут. Сэрии кэмигэр аччыктаабыппытын, илистэ үлэлээбиппитин хаһан да умнубаппыт диэн хойукка диэри саныыра.

Эбэбит кэлин элбэх оҕо ийэтэ буолбута, кэргэнэ,эһэбит ыалдьан эрдэ өлбүтэ.Эбэбит 78 хаарыгар үктэнэн, тоҕус оҕону төрөтөн, 1999 сыллаахха ыалдьан бу күн сириттэн күрэммитэ. Эбэбит Даайа олоҕо барыта үлэ-хамнас, олох иһин охсуһуу, оҕолорун көрүү-истии, улаатыннарыы, ас-таҥас кырыымчык кэмнэрин туоратыы, киһи-хара оҥортоон, үөрэттэрэн, инники олохторун, идэлэрин түстээн, олох суолугар бигэтик тирэннэрии этэ. Күндү дьоммут сырдык мөссүөннэрэ сүрэхпитигэр өрүү баар, кинилэр сырдык ааттара көлүөнэттэн көлүөнэҕэ салҕанан бара турар…

Автор: А.Аввакумова