Чичигинаров Петр Никитич

Биһиги хос эһэбит Чичигинаров Петр Никитич (Баракаас) 1916 сыллаахха Чурапчы улууһугар төрөөбүт. Чичигинаровтар аймах Аллый аҕа ууһуттан тэнийбит үөскээбит эбиттэр, Чурапчы Одьулуунуттан төрүттээхтэр эбитэ үһү, хайдах кэлэн Хатылыга Кыһыл партизан холкуоска олохсуйбуттара биллибэт эбит.  Хос эһэбит, Петр Никитич, кыра эрдэҕиттэн сытыы-хотуу уол, дьээбэни- хообону, көрү -күлүүнү олус сөбүлүүр буолан Баракаас диэн хос ааттаммыт. Кини сүрдээх имигэс, турникка, кольцоҕа араас трюктары оҥорорго күрэхтэһэр, олус сымса киһи эбитэ үһү.

1932 сыллаахха олоҕор аан бастаан ХТЗ, ЧТЗ трактордары, сеялкалары, самоскидтары көрөн олус интэриэһиргээбит, техникаҕа умсугуйбут. Хатылыга 1938 сыллаахха комбайн кэлбитигэр, уруулга бастакынан кини олорбут.

1938-1956 сылларга Оройуоҥҥа баар МТС-ка уон аҕыс сыл устата трактористаабыт, комбайнердаабыт. 1951 сыллаахха Дьокуускайга үөрэнэн, механик идэтин ылан Сельхозтехникаҕа үлэлээбит. Онно үлэлии сылдьан, төрөөбүт нэһилиэгэр Хатылыга механигынан анаммыт. Хос эһэбит айылҕаттан бэриллибит уус тыллааҕа, араас хоһооннору айара, уус-уран самодеятельностка кыттара эбитэ үһү. Тугу сэҥээрэ көрбүтүн хоһоон хомоҕой тылынан хоһуйара. Оччотооҕу оройуон «Социализм суола» хаһыатын иһинэн үлэлиир «Кустук» түмсүү бюллетеныгар, сэдэхтик да буоллар бэчээттэнэрэ эбитэ үһү. Киэҥ эйгэҕэ биллэр «Сир аргыһа» диэн хоһоону кини айбыта. Кэлин аҕатын курдук холкуос ууһа буолбут. 1940 сыллаахха эбээбитин Даайаны кэргэн ылан 9 оҕоломмуттар.

Эһэбит куоракка механизатордар куурустарыгар үөрэнэ сылдьан (1 эрээт, хаҥастан бастакы)

Сэрии кэмигэр эһэбит убайдарынаан Миитэрэй, Ньукулай буолан МТС-ка тракторист, комбайнер, слесарь, тимир ууһа буоланнар бронь ылан сэриигэ барбатахтар. Ол эрээри Кыайыы туһа диэн күүстэрин харыстаммакка үлэлээбиттэр, күнү-түүнү аахсыбакка үлэлээбиттэр. Сут-кураан, уоттаах сэрии сылларыгар бэйэлэрин харыстаммакка үлэлээн Кыайыыны уһансыбыттар.  Сэрии кэмигэр Кыһыл партизан холкуос бэрэссэдээтэлэ Попов Дмитрий Сидорович (Тымтай уола) дьонун-сэргэтин харысхаллаахтык салайан бары ыарахаттары этэҥҥэ тулуйбуттар.
Хомойуох иһин эһэбит олус эдэр сааһыгар 1963 сыллааха бу күн сириттэн күрэммитэ.Киниолорботох олоҕун оҕолоро, сиэннэрэ, хос сиэннэрэ, хос хос сиэннэрэ салҕыыллар…

Автор: Т.Аввакумов