Бурнашева Вера Еремеевна

Уус-Алдан оройуонун бастакы трактористката, тыыл, үлэ бэтэрээнэ, «Сталин» 1, 2 степеннаах орденын ковалера, үлэ туйгуна.

Мин хос эбээм, Бурнашева Вера Еремеевна 1923 сыллаахха Уус – Алдан улууhун Танда нэилиэгин Посельскайдар аҕа уустарыгар дьаданы ыалга төрөөбүтэ. Хос эбээм ийэтэ, аҕата  эдэр саастарыгар өлбүттэр. Эбээм тулаайах хаалан ыалтан-ыалга иитиллэн ким чээн диэбиккэ ымалыйа сүүрэр, үөрэр, чот – диэбиккэ муннукка ытаан оҕо сааһыттан тулаайах эрэйин этинэн – хаанынан билэн улааппыта. Хос эбээм 10 сааһыгар Курбуһах нэһилиэгэр көһөн кэлэн таайыгар Бурнашев Константин Анимподиновичка иитиллибитэ. Курбуһах оскуолатын 7-с кылааһын бүтэрбит. оскуолаҕа сылдьан ырыаһыт, үнкүүһүт сыты-хотуу кыыһы таба көрөннөр улаххан дьону алаастарынан кэрийэ сылдьан ааҕарга, суруйарга үөрэтэригэр сорудах биэрбиттэр. Советскай былаас сана атаҕар туран иһэр, бүтүн дойду үрдүнэн репрессия ыар тына бүрүкээбит кэмэ, дьон – сэргэ бэйэ-бэйэлэрин кытта аһаҕастык кэпсэппэт, итэҕэйсибэт кэмнэригэр киниэхэ көтөх, кырдьаҕас аты биэрэн алаастарынан кэрийэн дьону ааҕарга, суруйарга үөрэтэ сырыттаҕына , ата баран иһэн охтон түһэн өлөн хаалбыт, дьэ куттаныы бөҕө буолан председательга биллэрбитигэр, киэн айдаан тахсан, улаххан төлөбүргэ күһэйиллибит. Бу  айдаанна гражданскай сэрии геройа, аатырбыт культармеец Гаврил Васильевич Егоров «Партизан Егоров» түбэһэ кэлэн – «Бу тулаайах оҕоттон тугу ылаары, көтөх , кырдьаҕас аты биэрэннит өлбүтүгэр! Кини туох – да буруйа суох, акт суруйан этин үлэ дьонугар түнэтэн биэрин» — диэн буруйданартан быаһаабыт, инньэ гынан «Партизан кыыһа Биэрэ» — диэн ааттана сылдьыбыт.

1941 сыл Аҕа дойдуну аймаабыт Аҕа дойду сэриитэ саҕаламмыт сыла. Ийэ дойдутун көнүлүн, тутулуга суох буолуутун немецкай – фашисткай халабырдьыттартан көмүскүүр иһин кыргыһыы күөгэйэр  күннэригэр сылдьар, саамай доруобай, чэгиэн дьоннорбут, үүнэн иһэр ыччаттарбыт бэйэлэрин олохторун, тыыннарын толук биэрбиттэрэ. Тыылга оҕолор, дьахталлар, кырдьаҕастар хорсуннук  үлэлээбиттэрэ, фронна төһө кыалларынан түүлээҕинэн, аһынан — үөлүнэн көмөлөһө олорбуттарын билэбит – истэбит.

Хос эбээм сэрии сылларыгар Дьокуускай куоратка трактористары бэлэмниир механизационнай оскуолаҕа  үөрэммит. 1942-1945 с.с. Суотту, Саһылыкаан бөһүөлэктэргэ тракториһынан бааһыналарга үлэлиир. 1945 с. эбии байыанай үөрэххэ үөрэппиттэр. Аҕа дойду сэриитэ уһаабыта буоллар тракторист кыргыттары фронна ыытыахтаахтарын сэрэппит эбиттэр. Кыайыы буолбутун үлэлии сырыттахтарына биригэдьиирдэрэ атынан көтүтэн кэлэн биллэрбит. Ол түгэни олоҕум биир дьоллоох түгэнэ диэн кэпсиирэ. Сэрии кэнниттэн 1947 с дылы МТС – ка механигынан үлэлиир. Онтон кэргэн тахсан Курбуһах нэһилиэгэр кэлэн «Сталин» колхоз үүт ферматыгар сэбиэдиссэйинэн үлэлиир.

Хос эбээм Биэрэ төһө да 65 сыл эрэ олордор дьон – сэргэ махталын сэмэй майгытынан, үлэһитинэн ылбыта. Маннайгы трактористка, тыыл, үлэ бэтэрээнэ, «Сталин» 1, 2  степеннаах орденын ковалера, үлэ туйгуна. Кини сырдык мөрсүөнэ биһиги сүрэхпитигэр куруутун баар. Биһиги сиэн, хос сиэн оҕолоро кини олоҕун сырдата сылдьар ытык иэспит буолар.

 

 

Авторы: Хос сиэннэрэ, сиэннэрэ, о5олоро Бурнашевтар, Дьокуускай