Бурцев Афанасий Николаевич (1928 — 2002 сс.)

Биһиги эһээбит Бурцев Афанасий Николаевич 1928 сыллаахха Эҥэ нэһилиэгэр Үөһээ-Дьааҥы оройуонугар дьадаҥы дьиэ кэргэҥҥэ күн сирин көрбүтэ. Аҕата Ньукулай бултаан уонна таһаҕас тиэйиитигэр үлэлээн дьонун иитэрэ, ийэтэ сүөһү, дьиэ-уот көрөрө.

Сэрии саҕаланыытыгар эһээбит, 13 саастаах оҕо, холкуос араас үлэтигэр үлэлээн, дьонугар көмөлөһөрө. Сэрии ыар сылларыгар, кыайан үөрэммэккэ, кэнники 7 кылааһы Верхоянскай куоратыгар киэһээҥҥи оскуолаҕа үөрэнэн бүтэрэн, араас үлэлэргэ, ол иһигэр хорҕолдьун хостуур шахтаҕа кытта үлэлээбитэ. Кэнники бухгалтер курсун бүтэрэн, Баатаҕай уонна Верхоянскай куорат тэрилтэлэригэр бу идэни баһылаабыта.

Эбээбит Анна Прокопьевна 1966 сыллаахха Дьокуускайдааҕы финансовай техникуму бүтэрэн, Үөһээ-Дьааҥы оройуонун Эҥэ нэһилиэгэр саҥа тэриллэр сопхуоска бухгалтерынан ананан үлэлии барар, онно эһээбитин көрсөн, ыал буолаллар.

1967 сыллаахха К.К. Байкалов аатынан сопхуос тэриллэригэр Мэҥэ-Хаҥаласка Табаҕаҕа көһөн кэлэллэр, эһээбит бухгалтерынан үлэҕэ киирэр. Ол курдук К.К. Байкалов сопхуос Табаҕа отделениетыгар сүүрбэччэ сыл бухгалтерынан пенсияҕа тахсыар диэри үлэлээбитэ. Кини, төһө да бухгалтер анал үөрэҕэ суох буоллар, идэтин толору баһылаабыта, наһаа эппиэтинэстээх, ирдэбиллээх үлэһит этэ. Ол курдук сыллааҕы отчуоту оҥороору, түүннэри эбээбинээн үлэлииллэрэ, түүн үөһүгэр дылы суот тыаһа таһырҕыыра. Эһээбит К.К. Байкалов аатынан бириэмийэ лауреатын аатын сүгэн, Москваҕа ВДНХ-ҕа баран кэлбитэ, үлэлиир сылларыгар сопхуос, оройуон бочуотунай грамоталарынан бэлиэтэммитэ. Пенсияҕа тахсарыгар үлэ, тыыл ветеранын аатын иҥэрбиттэрэ.

Эһээбит эдэр сылдьан араас үлэлэргэ үлэлээн, тоҥон-хатан, тыҥатыгар тымныйыылах буолан, куруук ыалдьара, ол да буоллар, бултуурун сөбүлүүрэ, күһүн, саас эбээбит төрүт-уус алааһыгар Бойуолаҕа кустуура, сир астыыра. Биһиги эһээбит сахалыы кинигэлэри, хаһыаттары сөбүлээн ааҕара.

Эhээбит, пенсияҕа тахсан баран, эбээлиин бэйэлэрэ туспа кыра дьиэҕэ олорбуттара, кэнники доруобуйата мөлтөөн, тэлгэһэ иһиттэн ырааппат этэ, аргыый аҕай дьиэ ис-тас үлэтин үлэлиирэ.

Сиэнэ Д. Бурцева, педагог