Босикова (Григорьева) Надежда Гаврильевна (1934 г.р.)

 

Кулун тутар 18 күнүгэр 1934 с. Хахсык диэн Хаҥалас сиригэр күн сирин көрбүтэ. Хахсык диэн Дыгын Дархан түөлбэлээн олорбут Куллаты үрэҕин аттыгар баар сир. Аҕата кини 4 эрэ саастааҕар ыарахан ыарыыттан бу сиртэн күрэммитэ, онон биир саастаах Рая диэн балтын кытта тулаайах хаалбыттара.

Оҕо сааһа ыар сэрии кэмнэригэр түбэспитэ.  Ыал улахан оҕото буолан ийэтин кытта тэбис тэҥҥэ туох баар үлэҕэ барытыгар үлэлэспитэ (бурдук ыһыыта, сүөһү көрүүтэ уонна да атын). Ийэтигэр көмөлөһөрүн таһынан, оскуолаҕа хас да көстөөх сиргэ хааман тиийэн үөрэнэрэ.

Оскуоланы бүтэрэн баран, Дьокуускай куоракка биэлсэр үөрэҕэр үөрэнэ киирбитэ. Үөрэҕин бүтэрэн баран Уус Алдан улууһун Түүлээх нэһилиэгэр ананан үлэлии киирбитэ. Үлэлии сылдьан аналын көрсөн Буоһукаптарга кийиит буолбута. Кэргэнин Босиков Гаврил Дмитриевич дойдутугар Чэриктэйгэ 1967 сыллаахха көспүттэрэ. Гаврил Дмитриевич өр сылларга оскуола директорынан үлэлээбитэ. 4 оҕоломмуттара. Оҕолоро үөрэхтээх, үлэһит буолалларыгар иккиэн өйдөрүн-санааларын уурбуттара.

Биһиги эбээбит Надежда Гаврильевна  олоххо таптала, дьулуура, оҕолорун инникилэрин түстүүргэ бигэ санаата холобур буола турдун.

 

 

Автор: С.Малышева, ученица 3 класса.