Петр Алексеевич Борисов (14.01.1928- 22.10.2023 сс)

Амма улууһун бочуоттаах гражданина, тыыл, улэ бэтэрээнэ, Үлэ кыһыл знамя орден кавалера.
Мин эһиэхэ кэпсиир киһим, Петр Алексеевич Борисов, миэхэ хос- хос эһэм буолар. Кини 1928 сыллаахха тохсунньу 14 күнүгэр төрөөбүт. Төрөппүттэрэ Алексей Васильевич Борисов уонна Акулина Алексеевна Неустроева буолаллар. Ийэтэ эрдэ өлөн, аҕата сэрии фронугар баран, тулаайах аҥаардаах хаалбыт оҕону аймахтара Ильиннар, Адамовтар ылан иитэ сылдьыбыттар. Ол сылдьан 1940 сылллаахха 13 саастааҕар “Бөҕөргөтүү” холхуос чилиэнэ буолбут. Бастаан холхуоска оҕус сиэтээччинэн, атынан от таһыытыгар, сайынын от үлэтигэр үлэлээбит. 7 кылаас уөрэхтэммит. Кинини кытта бииргэ уөрэммит Мария Михайловна Никитина кэпсииринэн, биһиги эһэбит Петр Алексеевич холку, сымнаҕас майгылаах, оскуола биир бастыҥ спортсмена эбит. Хайыһарынан уонна волейболунан сөбүлээн дьарыктанара эбитэ үһү. Кэнсиэрдэргэ куруутун ырыа ыллыыра диэн ахталлар.
Петр Алексеевич 1953 сыллаахха 25 сааһыгар Анна Семеновна Чабыкиналыын холбоһон ыал буолан 13 оҕоломмуттар. Ону таһынан эдьиийин уолун Никитин Афанасий Егоровиһы 14-с оҕонон иитэннэр уөрэхтээх үлэһит оҥорбуттара.
Эһэбит 1961 сылтан саҕалаан ыччат сүөһүнү төлөһүтүүгэ идэтийэн туран үлэлээбит. Бэйэтин биир идэлээхтэрин саҥаттан саҥа кирбиилэргэ угуйбут бэртээхэй бачыымнардаах оройуон өрөспүүбүлүкэ чулуу үлэһитэ буолбут. Ол курдук эһэбит Петр Алексеевич килбиэннээх үлэтин иһин Бүтүн Союзтааҕы норуот хаһаайыстыбатын ситиһиилэрин быыстапкатын кыһыл көмүс мэтээлинэн наҕараадаламмыт. Саха Өрөспүүбүлүкэтин тыатын хаһаайыстыбатын бочуоттаах бэтэрээнэ буолбут. 1975 сыллаахха үлэтигэр үрдүк ситиһиитин иһин “Победа” сопхуос Крымҥа баран сынньанар путевканан наҕараадалаабыт. 1977 сыллаахха ыччат сүөһү көрүүтүгэр өрөспүүбүлүкэ үрдүнэн бастаан , Алтан нэһилиэгин Бочуоттаах олохтооҕунан үйэ-саас тухары киллэриллибит. 1980 сыллаахха дойду үрдүк наҕараадатынан – Кыһыл Знамя орденынан наҕараадаламмыт. Амма улууһун бочуоттаах олохтоооҕо, “Амма киэн туттуута” бэлиэ хаһаайына. Үлэ, тыыл бэтэрээнэ, 2018 сыллаахха Саха Өрөспүүбүлүкэтин Ытык сүбэтин “Почетный старейшина РС (Я)” түөскэ кэтиллэр бэлиэтин туппута.
Эһэбит Петр Алексеевич Борисов 1940 сылтан Аҕа Дойду сэриитин сылларыттан саҕалаан 1986 сылга диэри, барыта 46 сыл устата, сыратын биэрэн туран, көлөһүнүн тоҕон туран, олоҕун үлэҕэ анаабыта. Онон биһиги кини сиэннэрэ эһэбитинэн олус диэн киэн туттабыт.
Эһэбит Петр Алексеевич Борисов 95 сааһыгар сылдьан олохтон барбыта. Кини 13 оҕо аҕата, 33 сиэн, 45 хос- хос сиэннэр эһэлэрэ буолар . Кини оҕо сааһа эрэйдээх, ыарахан кэмнэргэ ааспыт. Ону биһиги сиэннэрэ өйдүү- ахта сылдьыахпыт. Олорон ааспыт сырдык чаҕылхай олоҕо куруук өйбүтүгэр- санаабытыгар үтүө өйдөбүл буолан сылдьыаҕа.

Автор: Т.Лаптева, ученица 6 класса.