Бочуров Гаврил Гаврильевич (1923 г.р.)

 

Мин хос эһэм Бочуров Гаврил Гаврильевич үлэ уонна тыыл бэтэрээнэ.

Кини, 1923 сыллаахха балаҕан ыйын 12 күнүгэр, Таатта оройуонун Хара Алдан нэһилиэгэр Бочуров Гаврил Степанович, Бочурова Ульяна Тимофеевна дьиэ кэргэнигэр үһүс оҕонон күн сирин көрбүтэ. Бииргэ төрөөбүт алтыалар: эдьиийэ Даайа, убайа Петр, балтылара Анна, Матрена, Мария. Уус Тааттаҕа үөрэнэ сырыттаҕына аҕата, убайа өлөннөр үөрэҕин тохтоппут. Оҕо сааһыттан дьиэ кэргэҥҥэ соҕотох уол буолан, колхоз араас үлэлэригэр эриллэн барбыт.

1942 сыл күһүөрү сайын Таатта оройуонугар Хара-Алдан нэһилиэгэр 100-кэ тиийбэт хаһаайыстыбалаах «Төрүттэнии» диэн тыа хаһаайыстыбатын холкуоһун фрону балыгынан хааччыйар сыалтан балык артыалыгар уларытан тэрийбиттэрэ.

Нэһилиэк 50 бастың үлэһиттэрэ, ол иһигэр биһиги эһэбит Бочуров Гаврил Гаврильевич уонна 18 сааһыттан үөһээ саастаахтар хабыллан,  балыктаабыттара.

Бу үлэҕэ былааны толоруу кытаанахтык ирдэнэрэ. Ол иһин балыксыттар муҥутуур кыахтарын туһанан, бары дьулуурдарынан, ахсаабат кыһамньыларын ууран үлэлииллэрэ.

Артыал 21 өрүс,11 үрэх туулаах, 15 илимнээх, 5 бэрэмээттээх, 2 муҥхалаах этэ. 1942 сыллаахха күһүн 30-ча тонна собо балыгы Арҕаа күөлгэ бултаан рыбзаводка туттарбыттар.  Кыһын Мохсоҕоллоох, Кыыртаах харгытыгар, бөһүөлэктэн 25 километр кэриҥэ аллараа сытар сиргэ, сыалыһардаабыттар. Үгүс балыгы  (40-ча тоннаны) Мохсоҕоллоохтон ылбыттар. Барыта 43 тонна балыгы туттарбыттар.

1943 сыллаахха Хара-Алдантан 4-5 көс ыраах баар “Ньээкийэнэн”, “Буруо көтүппүтүнэн” тэлэһийэн балыктаан, бултарын Дириҥ Борууга турар балык заводугар туттараллара, сылга 60 тонна балык бултаныахтааҕын быдан аһары толорбуттар.

1944 с. тохсунньутааҕы сорудаҕын болдьоҕун иннинэ 576% толорбуттар. 900 буут бастыҥ сортаах балыгы туттарбыттар.

Бу курдук бука бары кыайыы туһугар турунан үлэлээбиттэрэ.

Бочуров Гаврил Гаврильевич эбээбитинэн Варвара Федоровналыын 8 оҕону төрөтөн, улаатыннаран, үөрэттэрэн үлэһит дьон оҥорбуттара. Оҕолоругар кыра эрдэхтэриттэн үлэни таптыырга, дьоҥҥо-сэргэҕэ үчүгэй сыһыаннаах буоларга ииппиттэрэ, тус бэйэлэринэн олохторо онно холобур буолбута.

 

 

Автор: Максимова В.,  8  класс.