Бочкарев Роман Дмитриевич II (1922-1996 гг.)

 

Бочкарев Роман Дмитриевич II (1922-1996) –  сэрии уонна үлэ ветерана, «Аҕа дойду Улуу сэриитэ» II степеннээх орден, «Японияны кыайыы иһин» мэтээл кавалердара, Забайкальскай фронт ветерана, Главнокомандующай Генералиссимус Сталинтан 372№дээх  Хайҕал суруктаах, Мэҥэ Хаҥалас «Бочуотун кинигэтигэр» киирбитэ.

1940с Матта 7 кылаастаах оскуолатын туйгуннук үөрэнэн бутэрбит, комсомолга киирбит. Бастыҥ үөрэхтээх эдэркээн уолу «Кыhыл агроном» холкуос комсомольскай тэрилтэтин  сэкирэтээринэн талаллар,  улахан дьону үөрэтэр ликбез учууталынан аныыллар. Сэриигэ иккитэ ыҥырыллыбыт. Бэйэтин ахтыытыттан : “1943с бэс ыйын 10 күнүттэн балаҕан ыйын  22 күнүгэр диэри военнай госпитальга ыалдьан сытан баран военнай комиссиянан АВВК 34670 военнай медицинскэй 1890№дээх протоколунан дьиэбэр уоппускаҕа ыыппыттара.  1944с атырдьах ыйын 10 күнүгэр иккиһин армияҕа ылбыттара. Онно I Мөҥүрүөнтэн оҕонньоттору кытары барбытым. Кудинов В.Д., Говоров П.И. Иркутскайга хаалбыттара. Мин илин границаҕа барбытым, Массаевскай станцияҕа сулууспалаабытым. 1945с атырдьах ыйын 6 күнүгэр Китай народнай республикатын добровольнай армиятыгар көмөлөһө Хайлар куорат туһаайытынан 94с дивизия 152 стрелковай полкатыгар сылдьан границаны туораабыппыт. Сэриигэ Хайлар куоракка  1945с кыттыбытым. 16946 №дээх в/часть сылдьан төбөбөр чэпчэки ранение  ылбытым…»

Сэрии толоонуттан суруйбут суруктара, хоhоонноро бааллар. 1947с Зинаида Васильевна Скрябинаны кытары  ыал буолан, 9 о5ону атахтарыгар туруорбуттара. Холкуоска суотчуттаабыт, Уhун Эбэ уонна Матта лааппыларыгар продавецтаабыт, бу  сэлиэнньэлэргэ электрическэй уоту киллэриигэ үлэлээбит. 1961-1974сс  М. Горькай аатынан сопхуоска биригэдьиирдээбит, кассирдаабыт. 1979с диэри страховой агенынан үлэлээбит. Пенсияҕа да таҕыстар  окко ыччат звенотун салайбыт, араас быстах үлэлэргэ үлэлээбит.  Хас да төгүл Сельскэй сэбиэт депутата, оройуоннааҕы народнай суут сэтээтэлэ, профсоюз бэрэссэдээтэлэ, комсомольскай, партийнай тэрилтэлэр сэкирэтээрдэрэ, дружинник, охотинспектор, быыбардарга куруутун быыбар бэрэссэдээтэлэ, уус-уран самодеятельность көхтөөх кыттааччыта.Улуу Кыайыы 50 сылыгар анаан, табаарыстарын кэриэһин толорон, сүүрэн-көтөн,  бэйэтэ бырайыактаан, өйдөбүнньүк пааматынньыгы «Кыһыл Агроном» колхоз киин бөһүөлэгэр  Билир Күөлүгэр туруорбута.

 

 

 

 

 

 

 

 

 

 

 

 

 

 

 

 

Автор: В.Р.Гоголева