Бестинова (Дьячкова) Парасковья Петровна 91917-1991 гг.)

 

Хос эбээм Бестинова (Дьячкова) Парасковья Петровна (11.11.1917-29.09.1991) Өймөкөөн улууһун бастакы Бороҕон нэһилиэгэр Томтор таһыгар Бүөтүр олоҕо диэн сиргэ дьадаҥы ыалга күн сирин көрбүтэ. Тыыл, үлэ ветерана, сэрии кэмигэр 1941-1943 сылларга Горнай оройуонун райсоветыгар атыы-эргиэн отделын сэбиэдиссэйинэн улэлиир.

1943-1945 сылларга Горнай оройуонугар райпо бэрэссэдээтэлинэн       үлэлээбитэ, кэлбит ас-таҥас быһаччы хас биирдии киһиэхэ тиксэрин ситиспитэ. Куораттан аҕалар таһаҕаһы ыраах чугас дэриэбинэлэргэ ытынан, табанан, оҕоһунан оннооҕор кытарах ынахтары кытта көлүйэн түргэнник тарҕатары ситиспитэ.

Эбээм үлэни тэрийэр дьоҕурдаах, дьону сомоҕолуур күүстээх, эҥкилэ суох чиэһинэй буолан сэрии ыар сүт сылларыгар Горнай оройуонун дьонун хоргуппака, лимииткэ бэриллэр дохуокка киирэр астарын-үөллэрин, таҥастарын-саптарын тэҥҥэ үллэрэн, кэлиҥҥэ диэри Горнай оройуонун кырдьаҕастарын махталларын ылара.

Эбээм дьахталлары, оҕолору, оҕонньоттору мунньан бултатан, балыктатан, муҥхалатан, онон дьону аһатан, түүлээҕинэн үтүлүк, бэргэһэ тиктэрэн государствоҕа фроҥҥа диэн тутараллара. Күһүн алта атын оройуонтан оҕуһугар, ынаҕар тиийэ мобилизациялаан, көлүйэн, үс күн айаннаан Дьокуускайга киирэн, үүт, арыы, эт туттаран, онон үбүлэнэн төннөллөрүгэр наадалаах табаардарын, бурдуктарын, курууппаларын, чэйигэр, тууһугар тиийэ эргинэн кэлэллэрэ эбитэ үһү. Саамай ыарахан үлэнэн табаары аһы-үөлү тиэйии, сүөкээһин этэ, анал график, нуорма олохтоон аттарга 3 центнерга, табаларга 2 центнерга дылы ыйааһыннаах аһы-үөлү тиэйэллэрэ, 150-200 килэмиэтэрдээх ыраах сытар нэһилиэктэргэ эмиэ итинник аһы-үөлү тиэйэллэрэ. Төннөллөрүгэр кураанах айаннаабаттара, били бултаммыт түүлээхтэрин, балыктарын, отоннорун тиэйэн государствоҕа туттараллара. Сэрии сылларыгар салайааччы быһыытынан сасыарда 6 чаастан киэһэ хойукка 12 чааска дылы үлэлиирэ, хоммуньуус буоларынан элбэхтик нэһилиэктэргэ сылдьара, дакылаат, лекция ааҕара, сэрии сводкатын кэпсиирэ. Ыйдааҕы хамнаһа ол кэмҥэ 61 солкуобай эбитэ үһү, онтукайыттан 30 солкуобай оборуона фондатыгар угара, фроҥҥа кэргэниттэн хаалбыт саҥа таҥастарын ыытара, эргэ госзайм облигацияларын барытын оборуона фондатыгар, барыта кыайыы туһугар диэн укпута, хаалбыт отут биир солкуобайынан икки кыракый кыыһынаан ыйы туорууллара. 1945 сыллаахха сэрии бүтэригэр кэргэнэ үс сыл Кыһыл Армия кэккэтигэр сулууспалаан бүтэн демобилизацияланан баран Бэрдьигэстээххэ төннөн кэлэр уонна Амма оройуонугар прокурорунан ананар. Онон сиэттэрэн эбээбин “Холбос” бырабылыанньата Амма оройуонун райпотребсоюһугар   көһөрөр.

Эбэм ахтыытыгар маннык тыллары суруйан хаалларбыт: “Сэрии ыар сылларыгар ыраах сытар саха Сирин үлэһиттэрин чуолаан Горнай оройуонун бу ыарахан сэриини, хоргуйары,  тоҥору, тиийиммэти, доруобуйаны энчэритэри аахсыбакка туран туох баар күүстэрин кыайыыга анаан үлэлээннэр бу Улуу Кыайыыны ситиспиппит. Маннык тыыл баар буолан биһиги норуоппут хаһан баҕарар кимиэхэ да кыайтарыа суоҕа.” Итинник ыар кэмҥэ эбээм оҕолорун эрэ туһугар олорбокко, бүтүн нэһилиэк, дьонун сэргэтин туһугар үлэлээн – хамнаан ааспытын сэргии истэбин уонна киэн туттабын.

 

 

Автор: Г.Никитина, ученица 8 класса.