Батарин Федор Федорович (1925 г.р.)

Мин хос эһэм Федор Федорович Батарин олунньу 17 күнүгэр 1925 сыллаахха сүүрүктээх Амма Соловьев нэһилиэгэр төрөөбүтэ. Эһэм ийэтэ Настаа эрдэ тулаайах хаалан Хатылыга көһөн кэлбиттэр. Ийэлээх уол бэрт кырыымчык аска, таҥас-сап мөльтөҕөр бэйэни харыстаммакка үлэлээбиттэрэ.

1943 сыллаахха Кыһыл Армияҕа ыҥырыллыбыт, үчүгэй үлэһит буолан колхоз бэрэсэдээтэлэ колхозка үлэлиир гына хаалларбыт. Дойдуну көмүскүүр Улуу сэрии сылларыгар тыылга кыайыыны уһансыбыт. Эһэм улахан дьону кытта «Үлэҕэ килбиэнин иһин» мэтээл хаһаайынынан буолбут.

Уоттаах сэрии түмүктэнэн эйэлээх олоҕу тутуу саҕаламмыта. 1948 сыллаахха анал үөрэхтээх тырахтарыыс буолбута. Үлэтигэр хара бастакы күннэриттэн кыһамныылааҕын, дьоҕурдааҕын көрдөрбүтэ. Мэхэнисээтэр быһыытынан оройуонунан эрэ буолбакка, өрөспүүбүлүкэҕэ тиийэ сураҕарбыта. 1953 сыл Саха АССР Үрдүкү Сэбиэтин Бурусудьуумун Бочуотунай кыраамалатынан наҕараадаламмыта. Эдэрдэртэн биир бастакынан МТС «Бочуотун кинигэтигэр» киллэрбиттэрэ. Эһэм дьон-сэргэ убаастыыр буолан, холкуос, сопхуос оробуочайдарын туруорсуутунан мэхээньигинэн, хонуу биригэдьииринэн ананан дойдутугар таһаарыылаахтык үлэлээбит. Тыраахтарнай паарка базатын бөҕөргөтүүгэ, мэхэнисээтэрскэй каадырдары бэлэмнээһиҥҥэ үгүс сыратын биэрбитэ. Уһун кэмнэ кыһынны өттүтэр тыраахтарнай холуоннаны, сайынын оччуттар звеноларын салайбыта.

Эһэм Федор Федорович, хоммуньуус баартыйа эрэллээх байыаһа, коммунистическай үлэ ударнига, ыччат наставнига. Биэс ыҥырыы тухары олохтоох Сэбиэт дьокутаатынан талыллан нэһилиэк олоҕун-дьаһаҕын, үлэтин-хамнаһын тэрийсиигэ үгүс сыратын биэрбит дьоннортон биирдэстэрэ.

 

Д. Матвеев