Барашкова Лукерья Семеновна

Аҕа дойду сэриитин кыттыылааҕын огдообото, үлэ тыыл бэтэрээнэ –Барашкова Лукерья Семеновна.

Кулун тутар 8 күнүгэр, 1920 сыллаахха, Чурапчы улууһун Бахсы нэһилиэгин Кэмээдэтигэр олохтоох, Барашков Семён Бөтүрүөбүс уонна Готовцева Пелогея Павловна ыалыгар, оһоҕос түгэҕинээҕи оҕонон күн сирин көрбүтэ. Кини ийэтэ 22-тэ оҕоломмут да, оҕо турбакка, 21 оҕо бары кыраларыгар өлүтэлээбиттэр. Лөкүөйэ эмиэ кыра эрдэҕиттэн иринньэхтээн, 11 сааһыгар эрэ оскуола боруогун атыллаабыта. Оскуоланы бүтэрэр сылыгар, оччотооҕуга, 1933-1934 сыллардаахха, комсомол сэкирэтээринэн үлэлээбитэ.

Салгыы Кытанах нэһилиэгэр 5-с кылааһы, онтон Мэҥэ-Хаҥалас Нуораҕанатыгар 6-7-с кылаастары бүтэрэн, 7 кылаас үөрэхтэммитэ. Доруобуйатын туругунан үөрэхтэн туоруурга күһэллибитэ. Бахсыга 1938 сылтан сэбиэт сэкирэтээринэн үлэлээбитэ. Онно кини толорор сүрүн үлэтинэн үп агена этэ. Ити үлэтин быыһыгар 1939 сылтан, ликбезкэ түөрт сыл кэриҥэ улахан дьону үөрэхтээһиҥҥэ кыттыбыта. Оччолорго алаастарынан бытанан олорор дьону, үксүгэр сатыы сылдьан, ааҕарга, суруйарга үөрэппитэ. Саас оройуоннааҕы үөрэх салаатыттан тахсан Лөкүөйэ үөрэппит дьоно төһө ааҕар, суруйар буолбуттарын көрөн, сылга биирдэ дуона суох хамнас төлүүллэрэ үһү.

1941 сылтан Чурапчы улууһугар сут-кураан ыар сыллара этилэр. Ол сылларга, өрүскэ киирэн, от нуормалааччынан, таһаҕас атынаһатааччынан үлэлээбитэ. 1943 сыллаахха, Москва анныгар уоттаах сэрииттэн ыараханнык араанньынай буолан кэлбит, Ноговицын Сергей Константиновичка кэргэн тахсан, 8 оҕону төрөтөн, онтон 4 оҕо кыра саастарыгар өлөн, 4 оҕолоох хаалан ыал буолан, Бахсы Толоонугар олорбуттара.

Лөкүөйэ сэрии ыар сылларыгар, колхозка күүһэ кыайарынан үлэлээн, Сталин, Жуков төбөлөөх мэтээллэринэн, элбэх юбилейнай мэтээллэринэн, үгүс элбэх бочуотунай грамоталарынан бэлиэтэммитэ.  Кини саҥа5а-кэрэҕэ наһаа тардыһыылаах этэ. Кини хомуска оонньуура, уһун чабырҕахтары 80 сааһын ааһыар дылы нойосуус ааҕара. Айылҕаҕа сылдьарын, сир астыырын наһаа сөбүлүүрэ. Кини 89 сааһыгар бу олохтон барбыта.

А. Иннокентьев, 5  кылаас