Барашкова Февронья Петровна (1915 г.р.)

 

Мин,  Воронцов Павел  диэммин Ефрем Ильич Апросимов аатынан Күп орто оскуолатын бэһис кылааһыгар үөрэнэбин. Бүгүн мин эһиэхэ бэйэм хос эбэм Баращкова Февронья Петровна туһунан кылгастык кэпсиэхпин баҕарабын.

Хос эбэм Барашкова (Макарова)  Февронья Петровна 1915 сыллаахха от ыйын 12 күнүгэр Чурапчы улууһун Сылан нэһилиэгэр төрөөбүт. Кини сытыы-хотуу, көрдөөх-нардаах, кэпсээннээх  диэн кэпсииллэр.  Кини Бахсы нэһилиэгин олохтооҕун Барашков Михаил Денисовиһы кытта холбоһон эдэр саастарыгар ыал буолбуттар.

Сэрии иннинэ Бахсыҕа «Киров» колхуоска улэлээн олорбуттар. Кыайыылаах хотуулаах ыанньыксыт буолан хайҕабылга сылдьара.

Сэрии саҕаланар…Партия обкомун бюротун 1942 сыл атырдьах ыйын 11 күнүнээҕи № 213 ыйааҕынан- Чурапчы колхозтарын аҥарыттан ордуга Кэбээйи, Эдьигээн, Булун улуустарын устун балыкка диэн ааттаан көһөрүүгэ утаарыллыбыта.

Көһүүнү 8 киһилээх комиссия салайан ыыппыт. Көһөн тиийбиттэргэ олорор дьиэ, үлэлиир усулуобуйа, дьиэ-уот туттарга мас, оҕолору интернатка олордуохтара, ыйга биир киһиэхэ 16 киилэ бурдук бэриллэр диэн эрэннэрбиттэрэ…

Үс   хонук бэлэмнэниигэ биэрбиттэрэ. Балаҕан ыйын 5 күнүгэр оройуон үрдүнэн көһүү саҕаланар. Аллараа Бэстээххэ көлөнөн көһөн тиийэн, борохуот кэлиитин кэтэһэн нэдиэлэ, сорохтор ый аҥара, сорохтор 26 хонук кэтэспиттэр.

Хос эбэм эһэм үс оҕолорун уонна балтыларын кытта Хоту Булуҥҥа Мэҥкэрэ диэн сиргэ тиийбиттэр. Бастаан көһөн тиийбиттэрин кэннэ муус аннынан өрүскэ илимниир биригээдэлэри тэрийбиттэр.  Хос эбэм муус алларааччынан сылдьыбыт.  Ас-таҥас тиийбэккэ ыарахан кыһыннар, сыллар ааспыттар… Көһөн тиийбит дьоҥҥо олохтоох нэһилиэнньэ күүһэ, кыаҕа тиийэринэн көмөлөһө сатаабыттара. Дойдуларыгар Бахсыга от ыйын ортото 1946 сыллааха төннөн кэлбиттэр. Ол кэнниттэн соҕотох хаалбыт уоллара уонна балтылара ыарахан ыарыыттан күн сириттэн туораабыттар…

Көһөн кэлбит күннэриттэн саҥа олоҕу тутуһан колхуоска, онтон кэлин сопхуоска таһаарыылаахтык үлэлээбиттэрэ. 8 оҕоломмуттара. Хос эһэм 1970 сыллаахха ыарахан ыарыыттан күн сириттэн барбыт. Хос эбэм ол кэнниттэн кыргыттарыгар Уус-Маайа оройуонугар көһөн кэлэн олохсуйбут. Өр кэмҥэ  сопхуоска улэлээбит. Сиэннэрин көрөн- харайан 1998 сыллаахха диэри олорбута, 83 сааастааҕа…

Билигин хос эбэм 22 сиэнэ, 46  хос сиэннэрэ, 6 хос хос сиэннэрэ баарбыт.

Мин хос эбэбинэн, эһэбинэн киэҥ туттабын. Эр санаалаах, күүстээх-уохтаах, Кыайыы иһин охсуспут сэрии, тыыл бэтэрээннэригэр суһүөхтээх бэйэбит сугуруйэн тураммыт барҕа махталбытын тиэрдэбит. Болҕомтоҕут иьин махтал.

 

 

Автор: Правнучка: Р.Кухаренко