Баишев Михаил Софронович (1929-2015 гг.)

Аҕабыт, эһэбит, хос эһэбит Михаил Софронович Баишев үлэ, тыыл ветерана этэ. Кини 1929 сыллаахха кулун тутар 18 күнүгэр Уус-Алдан улууһун, 2с Байаҕантайыгар, Туруйалаах алааһыгар төрөөбүтэ.Ийэтэ Мотрена Дмитриевна Егорова-Баишева, аҕата Софрон Петрович Баишев.

Аҕата эрдэ өлөн, эр киһи үлэтэ барыта Мэхээлэ кыра санныгар сүктэриллибитэ. Аан дойдуну аймаабыт алдьархайдаах сэрии сылларыгар аҕам саҥа ситэн эрэр уолчаан үлэҕэ-хамнаска миккиллибитэ. Ол курдук 9 сааһыттан улахан дьону кытары тэбис-тэҥҥэ үлэлээн барбыта. Кирпииччэ үктээһиниттэн саҕалаан араас үлэни бара толороро. 11 саастаахпар холкуоска хаппарааллаабытым, отчуттартан отчуот таһар этим, таарыччы ас-үөл таһарым- диэн кэпсиирэ.16 сааспыттан Танда-Бээрийэ суолугар дьаамсыгынан үлэлээбитим диир этэ. Ол кэнниттэн экспедицияҕа “Колонковай» этэрээккэ сылдьыбыт. Нефть көрдөөн сири хаһарбыт диэн кэпсээбитэ.

Ол курдук, болуотунньуктаан үлэлии сырыттаҕына боруонньалааннар армияттан босхолообуттар. Сэрии бүтэригэр 17 саастаах уол, ийэтигэр дьиэ кэргэнигэр көмө буолаары Алданынан балыкка, онтон Хаҥаласка уонна Өлүөхүмэҕэ мас кэрдиитигэр үлэлээбит.

Дьокуускайга тыа хаһаайыстыбатын мезанизациялыыр 1 нүөмэрдээх училищены бүтэрэн, тракторист идэлээх дойдутугар Уус Алдан Мындаабатыгар 5 сыл үлэлээбит. 1954 сыллаахха Түүлээх нэһилиэгэр бастакы сабыс саҥа тыраахтары таһаарбыта. 2 сыл үлэлээн баран Лөгөйгө «Калинин» холкуоска эмиэ тракториһынан үлэлээбитэ. Кэлин РТС ка онтон эт-үүт кэмбинээтигэр, онтон тутууга үлэ үөһүгэр сылдьыбыта

Кэргэнэ Анна Афанасьевна Тролукова Хоро нэһилиэгин, Чараҥ бөһүөлэгин олохтооҕо. Ыал буолан Чараҥҥа олохсуйан 8 оҕону төрөтөн быр бааччы олорбуттара, сопхуоска уһуннук үлэлээннэр, Үлэ ветерана буолбуттара. Аҕабыт сүрдээх кыанар этэ, спорт бары көрүҥэр дэгиттэр этэ. Ол курдук ордук атах оонньууларыгар быраатынаан Михаил Атласовтыын нэһилиэктэринэн ыһыахха күннүүллэрэ. 7 нэһилиэккэ бастакы, иккис буолар этибит диэн кэпсииллэр этэ. Аҕабыт олус үчүгэй куоластаах этэ, тыына уһуна, холкута бэрдэ. Туруу үлэһит, тутууга ыҥырыыга сылдьара, сарсыарда эрдэ туран үлэтэ хамнаһа ырааппыт буолара. Сайынын илимнээн сибиэһэй собо бөҕөтүн сиир этибит.

Кыһынын туһахтаан куобаҕынан тото-хана күөстэнэрбит.Ийэбинээн быраҕыллыбыт алааһы сөргүтэн, ийэм төрөөбүт өтөҕүн саҥалыы тутан, күрүөлээн-хаһаалаан сүрдээх үчүгэй бэлэҕи оҕолоругар, сиэннэригэр хаалларбыттара. Сүөһүлээх-астаах олорбут буолан сайылык оҥостубуттара. Ол Хорбут диэн алааспытыгар билигин оҕолор, сиэннэр, хос сиэннэр сайын аайы баран сынньанан, дуоһуйан кэлэбит.

Баишев Михаил Софронович- үлэ, тыыл бэтэрээнэ, элбэх сиэн эһэтэ 87 сааһыгар диэри дьоһуннук олорбута, кэнчээри ыччата кини олоҕун салгыыллар.

 

 

Автор: Ахтыыны оҕолор, сиэннэр ааттарыттан оҥордо улахан кыыһа М.М.Корнилова.