Архипов Василий Дмитриевич I (1923 г.р.)

 

Василий Дмитриевич Архипов I, 1923 сыл тохсунньу ый 15 күнүгэр, Мэҥэ — Хаҥалас оройуонун I Тыыллыма нэһилиэгэр, дьаданы, крестьянскай дьиэ кэрэгэннэ Дмитрий Иванович, Екатерина Ивановна Архиповтарга бастакы оҕоннон төрөөбүт.

Василий Дмитриевич 1939 сылга 16 сааһыттан, 5 кылаас үөрэхтээх, холкуос чилиэнэ буолбут. 1940 сыл бэс ыйыттан балыксыт буолан 1948 сыл бүтүөр диэри балыксытынан, биригэдьииринэн үлэлээбит. Балыксыт буоларын быһыытынан  И.В. Сталин уурааҕынан броняланан сэрии фронугар барбатах. Балыксыттаабыт  кэмигэр дьулуурдаахтык, чиэһинэйдик үлэлээн Рыбозавод, Рыбтрест, Мэнэ-Ханалас оройуонун сэбиэтин элбэх грамоталарын ылбыт. 1946 сылга а5а дойду сэриитин 1941-1945 сылларыгар килбиэннээх үлэтин иһин Сталин  төбөлөөх  мэтээлинэн наҕараадаламмыт.

Салгыы 1949-1951 сылларга “Алаас” холкуоска хонуу биригэдьииринэн дьаныардаахтык үлэлээбит, ол кэннэ 1951 сылтан түүлээхситинэн ананан Кэбээйи оройуонугар бултка ыыппыттар.

Кэбээйи оройуонугар бултуур кэмигэр кини иннигэр туруоруллубут былааннарын 130-150% таһынан толортуур эбит,
ол курдук күүһүн-уоҕун харыстаабакка ойууру-тыаны тэлэн, тымныыны-куйааһы билиммэккэ бэриниилээхтик үлэлээбит.

Ол сылдьан 1958 сыл саас Кэбээйи сэлиэнньэтигэр Мария Николаевна Левина диэн эдэркээн кыыһы сөбүлүү көрөн кэргэн кэпсэтэн ыал буолан дьоллорун холбообуттар.

1958 сыл Кэбээйи сэлиэнньэтиттэн көһөн, “Кальвица” диэн балык артыала холкуоска иккиэн балыксытынан киирэн олохсуйбуттар. Онтон 1962 сылга холкуостарын Кэбээйи рыбозаводугар холбооннор, онно эһээбит балыксытынан 1975 сылга диэри үлэлээбитэ. Доруобуйата мөлтөөн 1975 сылтан рыбозаводтан уурайан Кэбээйи оройуонун сибээс тэрилтэтигэр почтальонунан 1985 сылга диэри улэлээбитэ, үчүгэй үлэтин иһин элбэх наҕараадалардаах, ветеран тыла.

Василий Дмитриевич олус үчүгэй, “калиграфическай” ыраас буочардааҕа, ыраастык суруйара, уопсайынан чэнчис, аккуратнай киһи этэ, оҕолоруттан эмиэ оннугу эрэйэрэ. Кини байанайдаах булчут этэ, өрүүтүн илии тутуурдаах, өттүк харалаах кэлэрэ, көтөрү, балыгы куулунан аҕалар буолара.

Тапталлаах кэргэнин кытта Мария Николаевналыын 10 оҕону төрөтөн, бүөбэйдээн, үлэлээн-хамнаан, эйэ дэмнээхтик, өйөһөн-үйдөһөн дьоллоох 49 сыл устата олорбуттара. Кини 84 сааһыгар 2007 сылга ыалдьан күн сириттэн барбыта.

 

 

 

Авторы: Неустроев Д., 3 класс и Неустроев К., 2 класс