Антонова Варвара Спиридоновна (1931-2014)

Мин хос эбэм Варвара Спиридоновна муус устар 1 күнүгэр 1931 сыллаахха Бүлүү оройуонун Баппаҕаайы нэһилиэгэр дьадаҥы ыалга төрөөбүтэ. Уон түөрт оҕоттон иккиэйэх буолан хаалбыттар.

Эдьиийинээн Раисалыын кыра оҕо эрдэхтэриттэн ыарахан үлэни кыайалларынан үлэлээн барбыттар. Сэрии уордаах сылларыгар, дьоно кырдьаҕас, үлэни-хамнаһы кыайбат буолан, уонун саҥа ааспыт кыысчан холкуоска туруу үлэһит буолбут. Ол курдук сүөһү бостууктаан, сайын от үлэтигэр, сиилэ сутуутугар улахан дьоннуун тэҥҥэ үлэлээн көлөһүн күнэ аахсан, дьонун хоргуйартан быыһаабыт. Ыраах учаастактарга кыра оҕо улахан дьоннуун көһөн олорон үлэлииллэр эбит. Ол кэмнэ таҥас-сап кэмчи буолан ынах тириитинэн таҥас тиктэ үөрэнэн иистэнэр буолар. Ол курдук кылыхатан от көнтөһө, сулара баайарга, этэрбэс, уллук, сутуруо, бэргэһэ тигэргэ үөрэммит.

Колхуос бэрэссэдээтэлэ Кириллин Кузьма Гаврилович сэрии кэмигэр кырдьаҕас оҕонньоттору «Сортуол» диэн учаастакка балыктатан ким да сүтэн өлбөтөх. Ону билигин да аҕа саастаах дьон махтана саныыллар, ахталлар. Ол курдук эбэм пенсияҕа тахсыар дылы холкуоска, сопхуоска ыанньыксытынан үлэлээбитэ.

Кини 1955 сыллаахха сүрэҕин анаарын Антонов Федор Алексеевиһы сүбэлэрин холбоон ыал буолбуттар. Биэс оҕолоох ыал ийэтэ, аҕата буолбуттара. Хос эһэбит кыра эрдэҕиттэн сылгыһытынан үлэлээн, сыспай сиэллээҕи энчирэппэккэ көрөн куруук ситиһииллээх үлэһит буолара. Кини эдэр сааһыгар олохтон туораан, эбэбит оҕолорун бэйэтэ көрөн-харайан, дьон, үлэһит оҥортообута.

Кэнники сылларга хос эбэм инбэлиит уолун кытары бииргэ олорбута. Биһиги хос сиэннэрэ, сиэннэрэ хас сайын аайы баран сайылыыбыт. Сайылыкка от-мас үлэтигэр көмөлөһөн илии-атах буолааччыбыт. Олох кырдьыар диэри сүөһүтүн, сылгытын көрөн-харайан олорбута. Кини биһигини малы-салы, ойууру, оту-маһы харыстыырга үөрэтэрэ, аҕа саастаах дьонно убаастабыллаахтык сыһыаннаһарга такайара. Кырдьаҕас киһи муударайа, билэрэ-көрөрө элбэх буоллаҕа. Сылдьан эрэ сүбэлэрин үллэстэ сылдьара. Уонна мин саамай өйдүүрүм диэн кини куруук, ханна да буоллар килиэбин бэйэтэ буһарара. Минньигэс сыттаах сибиэһэй килиэп.

Эбээ Балбаара 2014 сыллаахха ыам ыйыгар өлбүтэ. Эбэбит түөһүн элбэх мэтээл киэргэтэрэ, кини килбиэннээх үлэтин туоһута. Варвара Спиридоновна үлэ, тыыл ветерана, социалистическай үлэ ударнига этэ.

 

Е. Борисов