Антонова Парасковья Николаевна (20.09.1931-14.09.1997 сс.)

Хос эбээм, Антонова Парасковья Николаевна, 1931 с. Сортуолга төрөөбүтэ. 1954 с. Баппаҕаайы ситэтэ суох орто оскуолатын 7 кылааһын бүтэрбитэ. 1954-55 сс. Сталин аатынан холкуос ньирэй көрөөччүтүнэн, 1955-1956 cc. ветсанитар, онтон «Октябрь» холкуоска ыанньыксытынан, өр кэмҥэ сельсовекка дьиэ сууйааччынан үлэлээбитэ.

Парасковья Николаевна ис-иһиттэн сырдык, эйэҕэс санаалаах, куруук сандааран мичээрдии сылдьар этэ.  Кини ураты көнө майгылаах, аһыныгас сүрэхтээх, наһаа аламаҕай, сүрэхтээх үлэһит, дьоҥҥо куруук көмөлөһөр эрэ санаалаах этэ. Кини кэргэнинээн, Гаврил Моисеевичтыын 40-ча сыл устата бииргэ олорон, иллээх-эйэлээх ыал бастыҥа буолан, икки кыыс, биэс уол оҕолонон, аймах билэ дьонноругар, оҕолоругар үтүө өйдөбүлү, истиҥ сыһыаны, умнуллубат түгэннэри хаалларан,  дьоллоохтук олорон ааспыттара. Хомойуох иһин, иккис уол оҕолоро, Данил 21 сааһыгар армияттан кэлэн баран Намнааҕы педучилищены бүтэрээри сылдьан ууга түһэн өлбүтэ. Эбээлээх эһээбит  оҕолорун иитэн, улаатыннаран. Үөрэхтээн атахтарыгар туруорбуттара. Улахан дьиэ кэргэн араас кыһалҕаларын эбээбит барытын дьаһайара. Кини сатаабата диэн суоҕа, соло булбакка күнү быһа хачыгырайара. Оҕолорун кыра эрдэхтэриттэн үлэҕэ үөрэппиттэрэ, дьиэ ис-тас үлэтин барытын оҥортороллоро, бары анал сорудахтаах буолаллара.

Дьэ, ити курдук, саха ыалын сиэринэн үлэ үөрүүтүн, кыһалҕатын билэн олоҕу сыаналыырга, төрөтөр оҕону төлкөлүүргэ, иитэр сүөһүнү күрүөлүүргэ, туйах хатарааччылары киһи киһитэ гына иитэн таһаарарга бүтүн олоҕун анаабыт эбээбит, Парасковья Николаевна олоҕун кини ыччаттара салгыыбыт.

Кини сыралаах үлэтин, элбэх оҕолоох ийэ түбүктээх олоҕун сыанаалаан араас наҕараадалара,  грамоталара,   “Үлэ ветерана”, “1941-1945 сс.Аҕа дойду Улуу сэриитин кэмигэр килбиэннээх үлэтин иһин” мэтээллэрэ туоһулууллар. “Ийэ албан аата” диэн II, III истиэпэннээх мэтээллэрдээх, сэттэ оҕо ийэтэ этэ.

Эбээбит, Парасковья Николаевна олоххо дьулуурун, тулуурун уратытык сыаналыыбыт, тыыннаах холобур оҥостобут.

 

Хос сиэнэ Д. Осипов,   Дьокуускай куорат  1  кылааһын үөрэнээччитэ.