Антонов Гаврил Моисеевич (20.03.1935-17.08.2007 сс.)

Антонов Гаврил Моисеевич 1935 с. Баппаҕаайы нэһилиэгэр төрөөбүтэ. 1954 с. Баппаҕаайы ситэтэ суох орто оскуолатын 7 кылааһынан бүтэрбитэ уонна ийэтинээн Анна Семеновналыын Сталин аатынан холкуоска үлэлээбиттэрэ. 1956 с. оччотооҕу салалта сүөһүгэ сыстаҕас, тулаайах уолу таба көрөн, Ньурбатааҕы колхознай ветфельшердэри бэлэмниир курска ыыппыттара. Гаврил Моисеевич 1,5 сыл үөрэнэн, ситиһиилээхтик бүтэрэн төрөөбүт нэһилиэгэр үлэлиир. Кинини кытта Иван Семенович, Илья Афанасьевич, үс бэртэрэ үлэ үөһүгэр  түһэн үлэлииллэрэ. Оччотооҕуга учаастактарга атынан, табанан сылдьаллара, түүнүн-күнүн аахсыбакка, сылайары-элэйэри билиммэккэ суһал ыҥырыыларга сылдьаллара. Гаврил Моисеевич Сталин аатынан, «Октябрь» колхуостарга, «Орто Бүлүү», «Баппаҕаайы» совхозтарга 42 сыл устата эҥкилэ суох үлэлээбитэ. Эһээбит талан ылбыт идэтигэр бэриниилээхтик үлэлээн, дьон ытыктабылын ылбыта. Кини үлэлээбит сылларыгар элбэх грамотанан, дипломунан наҕараадаламмыта, IX пятилетка түмүгүнэн Коммунистическай үлэ «Бастыҥ ветсанитар» ударнига бэлиэни ылар чиэскэ тиксибитэ. «1941-1945 сс. Аҕа дойду Улуу сэриитин кэмигэр килбиэннээх үлэтин иһин»,  «Үлэ ветерана» мэтээллэринэн наҕараадаламмыта.

Гаврил Моисеевич ис-иһиттэн чэнчис, ыраас киһи этэ. Кини кэргэнинээн, Прасковья Николаевналыын 40-ча сыл бииргэ дьоллоохтук олорон, 7 оҕону төрөтөн, улаатыннаран үлэһит, үөрэхтээх, дьоҥҥо убаастанар үлэһит дьону иитэн таһаарбыттара. Билигин кинилэр олохторун сиэннэрэ, оҕолоро салҕыыллар.

Хос эһээм Гаврил Моисеевич ахтыытыттан:

«Мин, Антонов Гаврил Моисеевич Ньурбатааҕы 1,5 сыллаах колхознай ветеринарнай фельдшердар үөрэхтэрин 1956 сыллаахха бүтэрэн баран Баппаҕаайы ветпуунугар ветсанитарынан улэҕэ киирбитим. Ол саҕана ветпуун сэбиэдиссэйинэн Осипов Илья Афанасьевич үлэлиирэ. Иван Семенович фельдшер этэ. Ол саҕана Сталин, Ворошилов, Андреев аттарынан колхозтар бааллара. Онно уочаратынан барытын кэрийэн ыйы-ыйдаан сылдьарбыт. Совхоз буолуор диэри оннук сылдьыбыппыт. Совхоз саҥа тэриллэрин саҕана икки сыл кэриҥэ Баппаҕаайы ветпуунугар суос-соҕотоҕун хаалан хаалбытым. 1998 сылга дылы үлэлээбитим. Совхоз саҕана грамота, диплом элбэх этэ, IX пятилеткаҕа «Коммунистическай үлэ кыайыылааҕа» диэн знагы биэрбиттэрэ».

 

Хос сиэнэ Д. Осипов,   Дьокуускай куорат 1 кылааһын үөрэнээччитэ.