Анна Васильевна Кривошапкина (1926 г.р.)

 

Мин хос эбэм Анна Васильевна Кривошапкина 1926 сыл от ыйын 24 күнүгэр Арҕаа Хаҥалас 1-Дьөппөн нэһилиэгэр Василий Федорович, Прасковья Ивановна Борисовтар 6 оҕолоох ыалга төрөөбүтэ.1-Дьөппөҥҥө Хоруол Тумуһа диэн сиргэ олохсуйан олорбуттар. Аҕата Нуучча Бааска  диэн Еланка бастакы дьаамсыктарыттан биирдэстэрэ Лонгин Бурнашев сиэнэ эбит.

Эбэбит, төрөппүттэрэ эрдэ үйэлэнэн, 11 сааһыгар тулаайах хаалан, 6 оҕо тус туспа иитиллибиттэр. Сэрии саҕаланыытыгар 15 саастаах кыыс, оскуолаҕа үөрэҕин хаалларан, улахан дьону кытта тэҥҥэ колхозка үлэҕэ тахсыбыта.1947с Кыайыы күнүгэр ,,Үлэҕэ килбиэнин иһин» Сталин мэтээлин тутан олус үөрбүтүн кэпсиирэ. Ити сыл сэрииттэн эргиллибит Таатта Дьохсонуттан төрүттээх Кривошапкин Иван Сергеевичкэ кэргэн тахсыбыта.

Анна Васильевна уонна Иван Сергеевич Кривошапкиннар 53 сыл бииргэ олорон, 10 оҕону төрөтөн иитэн-үөрэттэрэн, дьон оҥортоон дьоллоохтук олорбуттара.

Эбэбит төрүттэрин удьуордаан, наһаа кыраһыабай, аламаҕай, сайаҕас туруору майгылаах, ыраас-чэбэр туттуулаах, олус мааны этэ.Кини  аһа-үөлэ, дьиэни-уоту тэрийэрэ, бэйэтэ таҥнар таҥаһа уратылардаах буолара. Анна Васильевна олус дьаһаллаах, барыны-бары сатыыр, сүрдээх үчүгэйдик иистэнэр, быысыбайдыыр да эбит.

Нэһилиэк общественнай олоҕор актыыбынайдык кыттара. Дьөппөҥҥө да, Тааттаҕа да олоҥхонон-тойугунан, оһуокайынан утумнаахтык дьарыктаммыта, самодеятельнай драмкуруһуокка да сылдьара.

,, Дьулуруйар Ньургун Боотур» олоҥхоҕо -Туйаарыма Куо; ,,Манчаарыга»- Күөх Кэтириинэ, ,,Тапталга» — Кэтириис оруолун толортообут.Хойукка дылы норуот ырыатын иэйиилээхтик, олус бэркэ толороро. 80-чатыгар диэри ыллаан-туойан, сцена бэтэрээнэ буоларынан, саха фольклорун сайдыытыгар  кылаатын киллэрбитэ. Анна Васильевна кулуупка, библиотекаҕа остуораһынан, эргиэн тэрилтэтигэр атыыһытынан бочуоттаах сынньалаҥҥа тахсыар диэри улэлээбитэ.

Наҕараадата: 

«1941-1945 сс. Аҕа дойду сэриитигэр килбиэннээх улэтин иһин», 

«Сэбиэскэй Сойуус маршала Жуков», Улуу Кыайыы үбүлүөйдээх сылларын мэтээллэрэ, 

«Ийэ буолуу мэтээлэ» І, ІІ истиэпэннэрэ», «Ийэ албан аата» І, II, III истиэпэннээх уордьаннар,

«Герой Ийэ» уордьан, «Коммунистическай үлэ ударнига» бэлиэ,

 «Дьиэ кэргэн бэлиитикэтигэр өҥөтүн иһин» бэлиэ,

«Орто-Амма нэһилиэгин Бочуоттаах олохтооҕо» бэлиэлэринэн наҕараадаламмыта.

Мин хос эбэбинэн Анна Васильевнанан киэн туттабын уонна киниэхэ махтанабын.

 

 

 

Суруйда Н.Иванова 3 б кылааһын үөрэнээччитэ