Андреев Афанасий Дмитриевич тѳрѳппүттэрэ Хатас нэһилиэгин Хамыйахтаах учаастагыттан чугас турар Тохтоойу диэн сиргэ олорбуттар. Оччотооҕуга аймах дьон бииргэ, ѳйѳһѳн-убаһан, үлэлээн-хамнаан, бэйэлэрин сүѳһүлэрин аһынан аһаан-сиэн олорбуттара.

1942 с. сэриигэ иккис хомуурга эһэбит Афанасий Дмитриевич ыҥырыллыбыта. Онно кини 20-лээх кыра уҥуохтаах, хатыҥыр, арылыччы кѳрбүт киэҥ харахтаах, нууччалыы билбэт, тѳрѳѳбүт түѳлбэтиттэн тэйбэтэх уолчаан этэ.

Ржевтааҕы кыргыһыы, «Марс» диэн ааттаммыт, Аҕа дойдуну кѳмүскүүр сэрии биир саамай кырыктааҕынан, элбэх сүтүктээҕинэн ааҕыллар. 15 ый устата ньиэмэстэр «Центр» диэн 28 ди- визияларын тохтоппут, Москваҕа саба түһэр суолу бэйэлэринэн бүѳлээбит мѳлүйүѳнтэн тахса боростуой саллааттар суорума суол- ламмыттара, олор истэригэр элбэх киһи Саха сириттэн этилэр.

Аҕабыт балаҕан ыйа бүтүүтэ бааһыран медсанбакка операцияланар, онтон Калинин куорат эвакогоспиталыгар 3 ый эмтэнэ демобилизацияланан уһун айан кэнниттэн дойдутугуар эр- гиллэр.

Афанасий Дмитриевич кэлээт да үлэлээн-хамнаан аймахтарын хоргуйууттан быыһаабытын дьоно, кинилэр оҕолоро махтана ахталлар. Кыайыы ыһыаҕа Хатаска буолбута, онно, сүүрүү күрэҕэр аҕабыт кыайан, мүһэ уонна кыра харчы ылбыт, онтон Хамыйахтааҕар сатыы түһэ турбут.

Афанасий Дмитриевич тыа сиригэр саамай тутаах үлэҕэ – сүѳһү кѳрүүтүгэр, от оттооһуҥҥа, от-мас тиэйиитигэр сылдьыбы- та. 50 сыл устата ѳрѳбүл, уоппуска диэни билбэккэ бэриниилээх- тик үлэлээбитэ, Хатаһын сайдыытыгар бэйэтин сэмэй кылаатын киллэрбитэ.

Субан сүѳһүнү кѳрѳр биригээдэҕэ эдэрдэргэ наставник, аҕа табаарыс быһыытынан сылдьара. Бииргэ үлэлээбит дьоно, сопхуос салалтата кинини биир да сүѳһүнү энчирэппэккэ кыстатан таһарар этэ диэн ахталлар.

Биһиги хос эбэбит, Кривошапкина Анастасия Филипповна Малтааны, Холболоох диэн сиргэ тѳрѳѳбүт. Афанасий Дмитриевиһы кытта 1944 с. холбоһон, бур-бур буруо таһааран 7 оҕону иитэн, үѳрэттэрэн үлэһит дьон оҥортообуттара. 4 уол бары армияҕа сулууспалаабыттара. Оҕолор бары сѳбүлүүр идэлэрин талан, киһи-хара буолан, дьиэ-уот тэринэн, оҕо-уруу тѳрѳтѳн кэллибит. Хос эбэбит 1975 с. ѳлбүтэ, оттон аҕабыт хос сиэннэрин кѳрѳн, 92 сааһын томточчу туолан, 2014 с. бу дойдуттан арахсыбыта, кини Хатастан барбыт бэтэрээннэртэн бэстилиэннэй хаалбыта.

Афанасий Дмитриевич – үлэ бэтэрээнэ, кини үлэтэ сыаналанан Москваҕа БСТХ быыстапкатыгар, Ленинградка бара сылдьыбыта, В.И. Ленин 100 сааһыгар «Килбиэннээх үлэтин иһин» мэтээлинэн наҕараадаламмыта. Хаста да «Коммунистическай үлэ ударнига»,

«Саха АССР чулуу бостууга», «Сүѳһү кѳрүүтүн I кылаастаах мааста- ра» ааттар иҥэриллибитэ. Аҕа дойду Улуу сэриитин кыттыылааҕа, Афанасий Дмитриевич, «Аҕа дойду сэриитин» II истиэпэннээх орденынан, мэтээллэринэн наҕараадаламмыта.

2012 с. Хатас нэһилиэгин дьаһалтатынан Афанасий Дмитриевичка – Хатас бочуоттаах олохтооҕо аат иҥэриллибитэ. Хатаска кини аатынан уулусса ааттаммыта.