Аммосова Елизавета Григорьевна (1928 с.т.)

Мин хос эбэм Аммосова Елизавета Григорьевна 1928 сыллаахха 1 Курбуһах нэһэлиэгэр Окойом күөлүгэр Күөттүккэ бааһынай дьиэ кэргэҥҥэ төрөөбүтэ. Оҕо сылдьан Курбуһах 7 кылаастаах оскуолатыгар үөрэнэ киирбитэ, сэрии саҕаламмытыгар икки кылааһы бүтэрэн баран, үөрэҕиттэн уурайбыта.

Сэрии кэмигэр оҕо эрдэҕиттэн колхуос араас үлэтигэр, сайынын от үлэтигэр, кыһынын сүөһү көрүүтүгэр үлэлээн, сааһын ситиитэ “Буденнай” колхуоска ыанньыксыттаабыта.

Эбэм сэрии кэмигэр тыылга үлэтин иһин “За доблестный труд в Великой Отечественной войне 1941-1945гг.”, «Ветеран труда» мэтээллэринэн, элбэх оҕолооҕун иһин “Медаль материнства”, “Материнская слава” уордьан иккис, үһүс степеннэринэн наҕараадаламмыта. Саха Өрөспүүбүлүкэтин бастакы президенэ М.Е. Николаев махтал суругунан сэрии кэмигэр тыылга сыралаах үлэтэ бэлиэтэммитэ.

 

М. Аммосов