Мин хос эбээм Афанасьева Татьяна Константиновна 1928с. тохсунньу 16 күнүгэр Чочу нэһилиэгэр Бэс Балдьаан күөлгэ төрөөбүтэ. 1937с. Чочуга Кычкин аатынан оскуолаҕа үөрэнэ киирбитэ, бэһис кылаастан үөрэҕиттэн уурайан Сыралта нэһилиэгэр Чкалов аатынан колхозка үлэлии барбыта.

Эбээм суругуттан «Сэрии сылларыгар СыралтаҕаЧкалов аатынан колхозка кыра оҕолорго кирээдэнэн бысталаан биэрбит оҕуруоттарын илиибитинэн таһан уу кутарбыт. Онно сайыны быһа моркуоп, луук, эриэппэ үүннэрэрбит, күһүн ону хостоон туттарарбыт, биригэдьииринэн Борисова А.М. үлэлээбитэ.

1943-1945 сс. сааһыгар, сайыныгар ыһыы үлэтигэр, сир алдьатыытыгар, оҕус сиэтэрим, булуук тутарым. Оҕустарбыт күлүмэннээн олох кыаттарбат этилэр, оччоҕо түүн үлэлиирбит. Отууга хоно сылдьан от мунньарым. Сарсыарда күн саҥа тахсыытыттан киэһэ күн киириэр диэри ходуһаттан тахсыбаккын, ардах түстэҕинэ хотуур туттаран от оҕустараллара, дьиэбитигэр дэҥҥэ ыыталлара. Сороҕор от кээһиитигэр оҕус сиэтэрим, бугул оннун харбыырым. Сайыны быһа атах сыгынньах сылдьарым, хадьымалга атаҕым дэлби бааһырара, хатырара, киэһэ ол аһыыта бөҕө буолара, оччолорго маас эҥин диэн суох этэ. Бурдук хомууругар эмиэ үлэлээбитим. Молотилканан бурдук астааһыныгар оҕус үүрэрим, сороҕор сиэрпэнэн бурдук быһарым, кутуйах хаһааһын хомуйан туттарарым. Фермаҕа үүтү учуоттааһыҥҥа биирдии ынаҕынан суруйарым, колхозка туох үлэ баар да барытыгар үксүн аччык сылдьар үлэлиир этибит. Сорох күн суорат аҕаллахтарына сир аһын эбэн сиирбит.»

Сэрии кэнниттэн дойдуну чөлүгэр түһэрэр күргүөмнээх үлэ саҕаламмыта. 1947с. Сыралта нэһилиэгэр ааҕар балаҕан сэбиэдиссэйинэн анаммыта. Оччотооҕуга нэһилиэккэ кулууп үлэтин, культурнай-массовай үлэни ааҕар балаҕаннар тэрийэллэрэ. Сэрии ыар сылларыгар фроҥҥа, тыылга эрэйи-муҥу көрбүт дьон, мунтуйбут өйдөрүн-санааларын чэбдигирдэр туһугар элбэх өрүттээх культурнай-массовай үлэни ыытыыга үгүс сыратын биэрэн үлэлээбитэ. 1948с. Сыралта нэһилиэгин советыгар депутатынан выборданан, нэһилиэк советын секретарынан талыллан 1956 с. Чочу нэһилиэгэ холбонуор диэри үлэлээбитэ.

1941-1945сс. килбиэннээх үлэтин иһин, Улуу кыайыы 30, 40, 50, 60, 65 үбүлүөйнэй ветеран тыла,  «Отличник Советской потребительской кооперации», «За доблестный труд в ознаменование 100-летия со дня рождения В.И.Ленина», «Медаль Жукова» мэтээллэринэн наҕараадаламмыта туоһулуур.

Автор: Д.Васильева, ученица 2 класса.