(15.06.1925 – 05.02.2014)

 1925 сыллаахха Таатта улууһугар Амма нэһилиэгэр Хотолдьу алааска Куприян Иванович Афанасьев, Софья  Христофоровна Малышева диэн ыалга төрөөбүтэ. Чычымах оскуолатын ситиһиилээхтик үөрэнэн бүтэрбитэ.

Аҕа дойду сэриитин кэмигэр Ааллаах Үүҥҥэ  «Первэй маай» холкуоска сайынын оҕуруот аһын үүннэриинэн, оттооһунунан дьарыктаммыта, государствоҕа оҕуруот аһын, хортуопуйу, хаппыыстаны тууһаан туттараллара, кыһынын сүөһү көрөллөрө, табанан түүлээхтээн продснабка туттараллара, аҕабыт бу үлэтин тэҥэ 250 км. Ыраах сытар Ааллаах Үүҥҥэ почта дьаамын таһыытыгар сылдьыталаабыта.

1943 сылтан саҥа тэриллибит комсомольскай тэрилтэ сэкирэтээринэн, холкуоска суотчутунан үлэлээбитэ. 1944 сыллаахха правление бэрэссэдээтэлинэн уонна Охотскай перевозтааҕы поселковай сэбиэт депутатынан өрө таһаарыллыбыта. Промышленнай оройуон буолан докумуоннары барытын нууччалыы толороро. Аҕа дойду сэриитэ бүтүүтэ колхуос тэрилтэ-хаһаайыстыба өттүнэн бөҕөргөөн “Аҕа дойду сэриитин сылларыгар килбиэннээх үлэтин иһин” мэтээлинэн наҕараадаламмыта. “Оччотооҕу түбүктээх, ыарахан сылларга син үлэлии-хамсыы түһүспүт эбиппин диэн билигин улаханнык астына саныыбын,” – диэн аҕабыт ахтара.

1949 сыллаахха Аллараа Амма сэбиэтин сэкирэтээринэн, 1950 сылтан Чычымах кулуубун сэбиэдиссэйинэн үлэлээбитэ.

1952 сыллаахха Дьохсоҕон кулуубун сэбиэдиссэйинэн ананан үлэлээбитэ.

1953 сыллаахха оройуон физкультураҕа уонна спортка кэмитиэтин бэрэссэдээтэлинэн анаммыта.

1952 сыллаахха Чычымах комсомольскай тэрилтэтин сэкирэтээринэн талыллыбыта, оччотооҕу ыччаттар үгүс сырдатар үлэни ыыппыттара.

Тахсыылаахтык үлэлиир эдэр киһини 1953 сыллаахха оройуон салалтата Дьокуускайдааҕы холкуос бэрэссэдээтэллэрин бэлэмниир тыа хаһаайыстыбатын оскуолатыгар үөрэтэ ыыппыта.  Манна үс сыл устата ситиһиилээхтик үөрэнэн, 1956 сыллаахха агроном идэтин баһылаан дойдутугар эргиллибитэ. Бу үөрэнэ сылдьан 1955  сыллаахха Дьокуускайдааҕы радиоклубка дьарыктанан радиотелефонист идэтин баһылаабыта.

Идэтинэн агроном үөрэхтээх. Нэһилиэккэ хортуоппуйу, оту-бурдугу үүннэриигэ анаан үлэлэспит бастакы дьонтон биирдэстэрэ буолар. Кэлин сылларга Амма нэһилиэгэр тыа хаһаайыстыбатын араас салааларыгар, Харбалаах тутуутугар, кыһынын ыраах учаастактарга олорон сылгы көрүүтүгэр, сайынын оттооһуҥҥа 1993 сыллаахха диэри үтүө суобастаахтык үлэлээбитэ.

Наҕараадата:

«За доблестный труд в Великой Отечественной войне 1941–1945 гг.» мэтээл, 1947 с.

«Тридцать лет Победы в Великой Отечественной войне 1941-1945 гг.» үбүлүөйдээх мэтээл, 1975 с.

«Сорок лет Победы в Великой Отечественной войне 1941–1945 гг.» үбүлүөйдээх мэтээл, 1985 с.

«Ветеран тыла» анал бэлиэ, 1995 с.

«Пятьдесят лет Победы в Великой Отечественной войне 1941–1945 гг.» үбүлүөйдээх мэтээл, 1995 с.

«Маршал Советского Союза Жуков» мэтээл, 1997 с.

«Шестьдесят лет Победы в Великой Отечественной войне 1941–1945 гг.» үбүлүөйдээх мэтээл, 2005 с.

«Ветерану Великой Отечественной Войны 1941–1945 гг.», Саха Республикатын  үбүлүөйдээх бэлиэтэ, 2005 с.

«Шестьдесят пять лет Победы в Великой Отечественной войне 1941–1945 гг.» үбүлүөйдээх мэтээл, 2009 с.