Мария Фоминична Абрамова (1904 – 1982 сс)

Мария Фоминична Абрамова 1904 с. Боотуруускай улууһун Болугур нэһилиэгэр дьадаҥы кэргэҥҥэ төрөөбүтэ.

Кыра эрдэҕиттэн үлэҕэ-хамнаска эриллэн, эрэйи эҥэринэн тэлэн улааппыта. 1931 с. Көстөкүүнэп аатынан табаарыстыбаҕа үлэлии киирбитэ.Дьэ ити сыллартан кыайыылаах хотуулаах үлэтэ саҕаламмыта. Ити кэмҥэ уоттаах сэрии саҕаламмыта. Хас биирдии саха ыалын аймаабыта. 1941 сыллаахха үлэни –хамнаһы кыайар хотор өттө сэриигэ ыҥырыллыбыттара. Онон колхуос үлэтэ кырдьаҕастарга , дьахталларга, оҕолорго сүктэриллибитэ.

Туох баары барытын – фроҥҥа! диэн девиһинэн үлэлээбиттэрэ. Хорсун хоодуот үлэһит Мария Фоминична барыларыттан бастыҥнар кэккэлэригэр сылдьара, ол курдук 1943 с.саас нэһилиэккэ сиэмэ бурдук наада буолбута, хантан да көмө суоҕа. Онон дьахталлар уу хаар тахсыан иннинэ салаасканан бурдук аҕала Чурапчынан Одьулууҥҥа барар буолбуттара. Үһүө буоланнар икки салаасканан сэттэ аҥар  көстөөх (75 км) сиргэ сатыы турунан нэһилиэги бурдугунан хааччыйбыттара. Ити курдук тыылга түүннэри күнүстэри үлэлээн кыайыыны уһансыбыттара. Мария Фоминична сыралаазх үлэтэ сыаналанан  «1941-1945 сс үлэҕэ килбиэнин иһин” мэтээлинэн наҕараадаламмыта.

Сэрии кэнниттэн колхозка ыанньыксытынан барыта 45 сыл устата үтүө суобастаахтык таһаарыылаахтык үлэлээбитэ. Кини үтүө таһаарыылаах үлэтин туһунан республика, оройуон хаһыаттарыгар таһаарбыттара. Оройуон, нэһилиэк Бочуот кинигэтигэр киллэрбиттэрэ. 1960  сыллаахха Москваҕа Бүтүн Союзтааҕы норуот хаһаайыстыбатын быыстапкатыгар баран кэлбитэ.

1971 сыллаахха  өр сыллаах үлэтин партия уонна Правительство үрдүктүк сыаналаабыта “Үлэ Кыһыл знамята орденынан” наҕараадаламмыта.

Кини туһунан колхуос отчуотугар “Колхоз бастыҥ ыанньыксыта М.Ф.Абрамова биэс сылга валовайынан 1316 центнер эбэтэр 2924  бөтүөн үүтү ыата. Ити түмүгэр колхоһугар 41,5 тыһыынча солкуобайдаах дохуоту киллэрдэ- диэн киэн тутта ахтыбыттара. Нэһилиэккэ ыытыллар колхозтаахтар отчуоттуур-быыбардыыр мунньахтарыгар колхуос үлэтигэр  баар итэҕэстэри -быһаҕастары аһаҕастык этэрэ, туруорсара.Нэһилиэгин аатыттан өрөспүүбүлүкэ, оройуон чулуу ыанньыксыттарын слеттарыгар кыттыбыта.

Бочуоттаах сынньалаҥҥа тахсан да баран олорботоҕо, ыанньыксыттаабыта, атыыр оҕустары көрбүтэ. 75 сааһын туолуор диэри үлэлээбитэ.

Олоҥхоһут удьуордаах буолан 12 сааһыттан олоҥхолуур уонна тойуктуур буолбут. Кинини аҕата үөрэппит. Аҕатын уонна убайын  батыһа сылдьан олоҥхолуур эбит.  «Ньургун Боотур” “Күн Тулуур Бухатыыр”о.д.а олоҥхолору толороро. Нэһилиэгэр уус уран самодеятельность актыыбынай кыттыылааҕа, сыанаттан түспэт артыыс этэ.

Харитон Семенович Абрамовтыын холбоһон, ыал буолан үс оҕону төрөппүттэрэ. Прасковья (1931), Еримей (1934), Мария (27.07.1954 с.)

Элбэх сиэн тапталлаах эбээтэ этэ.78 сааһыгар ыалдьан өлбүтэ.

 

 

Суруйда хос — хос сиэнэ С.Фомин 4 «г» кылааһын үөрэнээччитэ..