Абрамова Анисия Петровна (1923-1988 гг.)

Мин эбээм Абрамова Анисия Петровна 1923 сыллаахха Булгунньахтаах  дэриэбинэтигэр Сатаҕа элбэх  оҕолоох ыалга төрөөбүтэ. Ийэтэ, аҕата эрдэ өлөннөр,   эдьиийдэрэ Степанова Мария Петровна ииппитэ. Булгунньахтаах оскуолатын сэттэ кылааһын бүтэрбитэ. Оскуолаҕа  үөрэнэр кэмнэригэр  пионер, комсомол үрдүк  аатын сүкпүтэ.  Салгыы   бырааттаах,  балтыларын  көрөөрү  кыайан  үөрэммэтэҕэ, эдьиийигэр  көмөлөһөөрү колхозка үлэҕэ киирбитэ. БиҺиги  эбээбит 19 саастааҕар Аҕа дойду  сэриитэ  саҕаламмыта. Эдэр киһи сэрии  ыар  кэмигэр саамай ыарахан  үлэҕэ  эриллэр. Ол  курдук  суотчутунан, ферма биригэдьииринэн, Далгычыахха мас тиэйиитигэр үлэлиир. Бу ыарахан  үлэҕэ  эриллэн, тымныыны  тымныы  диэбэккэ  үлэлиир, аччык, аанньа аһаабакка сылдьан, үлэлээһинэ кэнники доруобуйатыгар охсор. Сэрии  бириэмэтигэр килбиэннээх үлэтин иһин Сталин мэтээлинэн 1947 сыллаахха  наҕараадаламмыта.

1949 сыллаахха сэрииттэн кэлбит биһиги эһээбитигэр, Пахомов Гаврил Васильевичка,  кэргэн  тахсан  биэс  оҕону  төрөтөр. Эһээбит  эрдэ  өлөн,  биэс оҕолоох  тулаайах хаалар. Оҕолорун  барыларын  атахтарыгар туруоран үөрэттэрэн  үлэһит оҥортуур, уон сиэннэнэр. Кэнники сылларга, пенсияҕа  тахсыар  дылы  ыскылаат харабылынан үлэлиир. Үлэлиирин тухары элбэх юбилейнай медалларынан, бочуотунай грамоталарынан, ол иһигэр Саха АССР Верховнай советын Грамотатынан, элбэх оҕолоох ийэ медалларынан наҕараадаланар.

1988  сыллаахха  ыарахан  ыарыыттан  ыалдьан  өлөр. Биһиги  эбээбит  сырдык  мөссүөнэ,  үтүө  майгыта,  олоххо  дьулуура,  үлэҕэ  сыһыана  биһиги  сүрэхпитигэр  иҥэн,  өрүү  тыыннаах,  биһиэхэ оҕолоругар,  сиэннэригэр,  хос  сиэннэригэр үтүө  холобур  буола туруоҕа.

Биһиги  эбээбит  Анисия  Петровна — үлэ,  тыыл  ветерана.

 

Автор: М.Никитин, 4 б кылаас.